Ef þú hefur fjárfest í leðurhúsgögnum er mjög mikilvægt að viðhalda leðrinu til að halda því fallegu og auka þar með líftíma þess.  Hér á eftir má líta á þau ráð sem að sölumenn okkar gefa með það fyrir augum að halda leðri fallegu.

Forðast skal að stilla húsgögnum með leðuráklæði upp í mikilli sól eða hita.  Slíkt leiðir til þess að leðrið þurrkast upp og leiðir til ofþornunar og í kjölfarið upplitunar. Aldrei skal nota sápur með upplausnar- efnum á leður.  Bensín, þynnir, skó- áburður, bón eða húsgagnaáburður eru öll efni með upplausnarefnum í og búast má við því að þau skaði leðrið ef þau eru notuð. Leggið ykkur fram við að halda leðrinu hreinu. Við þvott á leðri er mælt með notkun á þar til gerðum leðurhreinsiefnum, sem má meðal annars fá í verslun okkar.  Sé slíkt ekki fyrir hendi þá má prófa að nota volgt vatn með sápuspæni í. Nauðsynlegt er að bera næringu á leðrið 2-4 sinnum á ári.  Það veltur þó allt aftir því hversu mikið settið er notað. Rétt umhirða og góð umgengni heldur leðrinu fallegu, mjúku og notalegu og lengir líftíma sófasettsins um mörg ár.

Um eikarhúsgögn:

Heitt og þurrt loft veldur þenslu eða samdrætti í viðnum (límdir endar geta losnað, gegnheill viður getur sprungið á límingum, spónn getur opnast).  Æskilegasta hitastig á heimilum er 18-20 gráður á Celsius og rakastig 60-70%. Mikilvægt er að loftræsta herbergi reglulega. Notkun vatns:  Eik hefur djúpt æðakerfi, þess vegna er ráðlagt að hlífa viðnum sem mest við vatni.  Mikið vatn eyðileggur lakkhúðina og getur orsakað hvítar skellur á yfirborði. Húsgögn úr ljósri eik, dökkna fyrstu vikur og mánuði eftir afhendingu. Forðist sólarljós og færið skrauthluti til á yfirborði, til að ná jafnri litabreytingu.

Meðhöndlun eikarhúsgagna:

Almennt séð þurfa eikarhúsgögn ekki mikla umhirðu. Oftast er þurrkað af með rökum klút og síðan aftur yfir með þurrum klút.  Forðast skal of mikla notkun á vatni. Ef hellt er niður (feiti, áfengi og fl.) þá er gott að þurrka upp með svampi (bleyttur í volgu vatni) og þurrka síðan með þurrum klút.  Strjúkið alltaf langsum eftir legu (víindum) viðarins.

Mjög mikilvægt!!!

Notið aldrei kemísk efni (töfraefni s.s. spray, sandpappír, stálull eða efni með sílikoni).  Þessi efni geta skaðað lakkið og skilið eftir bletti sem ómögulegt er að fjarlægja. Húsgögn með glansandi yfirborði má vaxbera til að fríska þau upp.  Matt lakkað yfirborð má hins vegar ekki vaxbera, þar sem að það gefur gljáa og eyðileggur matta útlitið.  Ekki er hægt að ná möttu útliti aftur ef vax hefur verið notað.  Setjið aldrei heita hluti (potta eða pönnur) beint á viðinn.  Það eyðileggur lakkið með því að skilja eftir sig hringi sem ekki er hægt að ná af.  Hlutir sem látnir eru á eikarhúsgögn geta skilið eftir sig rispur og mar.  Setjið filt undir slíka hluti.